Службай дзяржаўных закупак Рэспублікі Карэя (Public Procurement Service of Korea) створана і падтрымліваецца сістэма электронных дзяржаўных закупак:

З 2004 г. усе працэдуры дзяржаўных закупак (аб'ява тэндэру, разгляд вынікаў, заключэнне кантракта, аплата, кантроль пастаўкі і г.д.) пераведзены ў электронную форму і ажыццяўляюцца праз адзіную сістэму (партал) дзяржаўных закупак KONEPS (Korea ON-line E- Procurement System).

Асноўны аб'ём аперацый у рамках сістэмы дзяржаўных закупак даступны толькі кампаніям-рэзідэнтам Рэспублікі Карэя. Для рэгістрацыі ў якасці пастаўшчыка неабходна прайсці працэдуру акрэдытацыі, уключаючы атрыманне электроннага лічбавага подпісу і рэгістрацыю адбітка пальца супрацоўніка, упаўнаважанага праводзіць аперацыі ў сістэме (карыстальнік сістэмы павінен устанавіць адпаведнае сканавальнае абсталяванне). Акрамя таго, усё справаводства ў рамках сістэмы KONEPS вядзецца на карэйскай мове.

У некаторых выпадках, калі запланаваная закупка загадзя прадугледжвае пастаўку тавару з-за мяжы, да ўдзелу ў тэндэрах дапускаюцца таксама замежныя кампаніі. Пералік такіх заявак даступны ў англамоўнай версіі сайта Службы дзяржаўных закупак у раздзеле “Bid Information” з перакладам на англійскую мову.

Для ўдзелу ў тэндэрах неабходна накіраваць заяўку аб рэгістрацыі кампаніі ў якасці пастаўшчыка Службы дзяржаўных закупак Рэспублікі Карэя, а таксама заяўку на атрыманне электроннага лічбавага подпісу.

Адной з умоў рэгістрацыі замежнай кампаніі ў якасці пастаўшчыка з'яўляецца наяўнасць прадстаўніка (агента, кантактнай асобы) у Рэспубліцы Карэя. Анкеты і іншыя дакументы павінны запаўняцца на карэйскай мове або суправаджацца натарыяльна завераным перакладам на карэйскую мову.

Пасля рэгістрацыі ў Сістэме дзяржаўных закупак замежныя кампаніі маюць магчымасць прымаць удзел у тэндэрах, у якіх дапускаецца ўдзел замежных рэзідэнтаў.