Аб удзеле Пасольства ў фестывалі Seongbuk Global Food Festival
12.06.2026 г.7 чэрвеня 2026 года Пасольства Рэспублікі Беларусь у Рэспубліцы Карэя сумесна з прадстаўнікамі беларускай дыяспары прыняло ўдзел у гастранамічным фестывалі “18th Seongbuk Global Food Festival – Nurimasil”. На фестывалі былі прадстаўлены дыпламатычныя місіі 26 краін, акрэдытаваных у Рэспубліцы Карэя.
Арганізатарамі мерапрыемства выступілі адміністрацыя сталічнага раёна Сонгбук і Культурны фонд Сонгбук пры падтрымцы мэрыі г. Сеула.
Традыцыйна Беларусь частавала ўдзельнікаў фестывалю блінамі, дамашняй выпечкай і іншымі стравамі нацыянальнай кухні, якія атрымалі станоўчую ацэнку з боку гасцей.
У рамках мерапрыемства Пасол Рэспублікі Беларусь у Рэспубліцы Карэя Андрэй Чарнецкі сумесна з жонкай прынялі ўдзел ва ўрачыстай цырымоніі адкрыцця фестывалю. У ходзе яе афіцыйнай часткі кіраўнік беларускай дыпмісіі выступіў з прывітальнай прамовай:
“Сёлета дэвізам фестывалю “Nurimasil” стаў лозунг “Свет на тваёй талерцы». Гэты дэвіз набывае асаблівую сімвалічнасць у наш няпросты час. Ва ўмовах захавання напружанасці ў сусветнай палітыцы неабходна памятаць, што мы ўсе знаходзімся на адной талерцы, якая называецца планета Зямля. Гэтая талерка напоўнена мноствам разнастайных культур і традыцый. Іх захаванне — галоўная задача чалавецтва”.
Штогадовы фестываль “Seongbuk Global Food Festival” шырока вядомы не толькі тым, што дае наведвальнікам магчымасць пазнаёміцца з культурамі і кулінарнымі традыцыямі розных краін свету, але і сваёй прыхільнасцю да прынцыпаў устойлівага развіцця і аховы навакольнага асяроддзя. У 2026 годзе падчас мерапрыемства функцыянавала асобная “Спецыяльная зона кліматычнай гастраноміі”, прысвечаная экалагічным каштоўнасцям і сродкам барацьбы з глабальным пацяпленнем.
